ఎస్వీబీసీ అశ్లిల లింక్‌ దుమారం : సీఎం జగన్ సీరియస్ ప్రక్షాళనకు ఆదేశాలు


రాష్ట్రంలో సంచలనం సృష్టించిన ఎస్వీబీసీలో పోర్న్ లింక్ వివాదంపై ముఖ్యమంత్రి వైఎస్ జగన్మోహన్ రెడ్డి ఆరా తీశారు. అలాంటి ఘటనలకు పాల్పడ్డ వారిపై కఠిన చర్యలు తీసుకోవాలని తిరుమల తిరుపతి దేవస్థానం (టీటీడీ) అధికారులను సీఎం జగన్ ఆదేశించారు. ఎస్వీబీసీ చానల్‌ను పూర్తిగా ప్రక్షాళన చేయాలని స్పష్టం చేశారు. అలాగే ఆధ్యాత్మిక చింతనతో శ్రీవారి విశిష్టతను వివరించేలా కార్యక్రమాలు ప్రసారం చేయాలని సీఎం జగన్ ఆదేశాలు జారీ చేశారు.


కాగా, ఈ ఏడాది సెప్టెంబ‌ర్‌లో వెంక‌ట క్రిష్ణ అనే భ‌క్తుడు శ‌‌త‌మానం భ‌వ‌తి కార్యక్రమానికి సంబంధించిన వివ‌రాల‌ను మెయిల్ ద్వారా టీటీడీని కోరారు. దీంతో ఎస్వీబీసీ ఉద్యోగి భక్తుడికి ఓ అశ్లీల‌ వెబ్‌సైట్‌కు సంబంధించిన లింక్ పంపించారు. దీనిపై భ‌క్తుడు టీటీడీ చైర్మన్‌, ఈవోలకు ఫిర్యాదు చేశారు. ఈ విష‌యంపై స్పందించిన‌ టీటీడీ చైర్మన్‌ వైవీ సుబ్బారెడ్డి, ఈవో జవహర్‌ రెడ్డి విచార‌ణ‌కు ఆదేశించారు.


దాదాపు 25 మంది సాఫ్ట్‌వేర్‌ ఇంజినీర్లతో ఎస్వీబీసీలోని అన్ని కంప్యూటర్లను సెక్యూరిటీ అడిట్ చేశారు. ఈ టీం దర్యాప్తులో నిందితుడే కాక మరో ముగ్గురు నుంచి నలుగురు ఉద్యోగులు ఇలాంటి పనులు చేసినట్లు తెలిసింది. ఇంకా ఎంతమంది ఉద్యోగులు ఇలాంటి పనులు చేశారో పరిశీలించి వారిని కూడా ఉద్యోగం నుంచి తొలగిస్తామని ఎస్వీబీసీ సీఈవో వెల్లడించారు. ఈ తరుణంలో సీఎం జగన్ ఈ ఘటనపై సీరియస్ అయ్యారు. ఎస్వీబీసీని ప్రక్షాళన చేయాలని ఆదేశించారు.

6 views

Recent Posts

See All