‘ట్రాఫిక్ చలాన్ల పైసలు మొత్తం జీహెచ్ఎంసీ కట్టేలా చేస్తాం’-బండి సంజయ్.


గ్రేటర్ హైదరాబాద్ మున్సిపల్ కార్పొరేషన్ (జీహెచ్ఎంసీ) ఎన్నికల కోసం బీజేపీ సంచలన హామీ ఇచ్చింది. ట్రాఫిక్ నిబంధనలు పాటించనివారికి పోలీసులు విధించే జరిమానాలను, జీహెచ్ఎంసీయే చెల్లిస్తుందని ఆ పార్టీ తెలంగాణ రాష్ట్ర అధ్యక్షుడు బండి సంజయ్ కుమార్ హామీ ఇచ్చారు.

అంతేకాదు, ట్రిపుల్ రైడింగ్ చేసే (ఒకే బైక్‌పై ముగ్గురు వెళ్లడం) యువతను ప్రభుత్వం లక్ష్యంగా చేసుకుంటుందంటూ ఆయన విమర్శించారు. హైదరాబాద్ ఓల్డ్ సిటీలో ఎవరూ జరిమానాలు చెల్లించడం లేదనీ, వారి దగ్గర నుంచి ప్రభుత్వం వసూలు చేయడం లేదని ఆయన ఆరోపించారు.

ఈ వ్యాఖ్యలపై సోషల్ మీడియాలో తీవ్ర చర్చ జరిగింది. సాధారణంగా పౌరులు చేసే తప్పులకు శిక్షగా జరిమానా వసూలు చేస్తుంటాయి ప్రభుత్వాలు. కానీ, పౌరుల తప్పులకు ప్రభుత్వాలే జరిమానా చెల్లించేలా చేస్తామంటూ సంజయ్ ఈ హామీ ఇవ్వడం చాలా మందిని విస్మయానికి గురి చేసింది.

సంజయ్ తీరును లోక్ సత్తాలో పనిచేసిన కటారి శ్రీనివాస్ తప్పుపట్టారు.

‘‘ఓల్డ్ సిటీలో పట్టించుకోవడం లేదు. ఇక్కడ వసూలు చేస్తున్నారని ఆయన ఆరోపించారు. అది సరికాదు. ఒకవేళ తప్పు జరిగితే ఆ తప్పును సరిదిద్దే ప్రయత్నం చేయాలి. అంతే కానీ, మీరూ తప్పు చేయండి అనడం పరిష్కారం కాదు’’ అని ఆయన అన్నారు.


4 views